Impasigurado ti La Trinidad Municipal Police Station ti nainget a panagmonitor dagitoy kadagiti landslide ken flood prone areas iti munsipyo ti La Trinidad ita a panagbabagyo.
Iti pannakiuman ti Bombo Radyo kenni PLTCOL. Benson Macli-ing, hepe ti La Trinidad Municipal Police Station, nagrikusda idi rabii kadagiti lugar a kanayon a malaylayos kas iti strawberry farm, Rotonda, Buyagan, ken idiay Longlong road.
Innayonna pay a nadalusanen dagiti exit drainage idiay Rotonda, Buyagan.
Maipalagip nga idi Oktubere a nuebe ket nalayos ti Rotonda, Buyagan gapu iti napigsa a panagbayakabak ti tudo.
Iti sabali a bangir, impakaamo ni Macli-ing kadagiti motorista a mabalinda nga agbiahe iti laksid dagiti coding schemes laketdi aramatenda dagiti luganda para kadagiti emergency iti panawen ti bagyo.