BAGUIO CITY – Agtultuloy ti istrikto a monitoring ti Baguio City Police Office Station 8 iti masakupan ti San Vicente, Baguio City a naipasidong iti lockdown manipud itay kanikadua.
Sigun kenni Pol. Capt. Kurt Pacificar, commander ti BCPO Station 8, dagus a namuntaran iti barikada ti amin nga entry ken exit points ti barangay kalpasan ti panangideklara ni Mayor Magalong iti lockdown.
Dinayawna ti kina-aktibo dagiti opisial ti barangay San Vicente iti pannakaipatungpal dagiti paglintegan ti lockdown.
Impettengna a kas maibasar iti kabarbaro a pammilin ti liderato ti pulisya ket dagus a makemmeg ken makaswan dagiti aglabsing iti ECQ ken saanen a masapul a maballaagan dagitoy.
Mainaig iti daytoy ket impannakkel ni Pacificar nga awan pay ti nadagsen a kaso a nairekord iti masakupan ti BCPO Station 8 kabayatan ti ECQ.
Kabayatanna, impanamnamana a masalsalwadan ti salun-at dagiti pulis kabayatan ti panangipatungpalda iti trabahoda kas frontliners.
Kinunana nga inaldaw nga adda ti maipatpatungpal a health assessment kadagiti pulis tapno mabantayan ti salun-at dagitoy.