BAGUIO CITY – Im-imbestigaran ita ti lokal a gobyerno ti Baguio dagiti agpampamarang a residente ti siudad tapno laeng makapagnumar iti bakuna kontra iti COVID-19.
Daytoy ket kalpasan a naawat ti opisina ni Mayor Benjamin Magalong dagiti report nga adda dagiti saan a residente ti Baguio nga agar-aramat ti peke a dokumento tapno laeng mabakunaan dagitoy.
Sigun kenkuana, kitkitaenda ita ti rekords ti siudad gapu iti nasao a pasamak.
Dinakamatna a ti modus dagiti nasao nga indibidual ket agalada ti certificate of residency iti maysa a barangay babaen iti tulong dagiti kakabagyanda ditoy siudad tapno makapagnumarda iti bakuna iti baet nga awanan dagitoy ti tagikua wenno pagtaengan ditoy Baguio.
Naladingitan pay ti mayor iti pananggundaway dagiti nasao nga indibidual ita a nga adda ti pandemya.
Gapu iti daytoy, nainget ti imbestigasyon nga ipatpatungpalda ken mabukbukelen dagiti baro a pagalagadan a maipatungpal tapno maliklikan ti panakagundaway ti vaccination rollout ti gobyerno.
Posible met a sumango iti kaso a fraud wenno ti falsification of documents dagiti indibidual a maduktalan nga agar-aramid iti nasao a modus.
