BAGUIO CITY – Impalagip ti Land Transportation Office (LTO) – Cordillera ti nainget a panangsukimat dagiti private emission testing centers kadagiti lugan sakbay a maiturong iti opisinada tapno maiparehistro.
Kasaruno daytoy ti reklamo a naipadanun iti lokal a konseho ti Baguio nga awan ti mapaspasamak nga emission testing kadagiti luglugan a maiturturong kadagiti emission testing centers.
Maibasar iti reklamo, saan a masuksukimat a nalaing dagiti lugan no napintas ti asok dagitoy wenno saan sakbay a maiparehistro iti LTO.
Iti naangay a sesyon ti lokal a konseho, pinaglibakan ni Gregorio Retuta Jr., dadaulo ti LTO-Baguio Licensing Center ti nasao a reklamo.
Sigun kenkuana, adda ti pammaneknekda nga ar-aramiden dagiti private emission testing centers ditoy siudad ti trabaho dagitoy a mangsukimat kadagiti lugan a maiparehistro iti LTO.
Nupay kasta, impanamnamana a sukimatenda a nalaing dagiti nasao a testing centers tapno maliklikan ti kapada a reklamo.
Impetteng met ti dadaulo ti Committee on Urban Planning, Lands and Housing ti lokal a konseho ti Baguio ti nainget a panangimbestigar ti LTO-Baguio iti nasao a pakaseknan gaputa napateg unay ti resulta ti emission testing no mairehistro wenno saan ti maysa a lugan.
Impettengna a babaen iti daytoy ket masalwadan ti aglawlaw ken saan a manayonan dagiti mangpataud ti polusyon iti lokalidad.
