BAGUIO CITY – Binilin ti lokal a gobyerno ti La Trinidad, Benguet dagiti maseknan nga establishimento a mangawat laeng kadagiti marketgoers a mangiparang kadagiti Market Pass iti naka-schedule a market day dagitoy.
Maibasar iti pakaammo, nainget a mawanawanan dagiti aglabsing iti impaulog a pammilin ti lokal a gobierno kagiddan ti panakaipaisidong ti rehion iti general community quarantine
Maibasar iti market day schedule, naituding a market day ti Lunes para laeng kadagiti residente ti Pico ken Bineng; ti Martes para laeng kadagiti residente ti Balili ken Alno; ti Miyerkoles para laeng kadagiti residente ti Poblacion, Beckel ken Cruz; ti Hwebes para laeng kadagiti residente ti Tawang, Alapang ken Shilan; ti Biyernes para laeng kadagiti residente ti Puguis, Bahong ken Wangal ken ti Sabado para laeng kadagiti residente ti Betag, Ambiong ken Lubas.
Nailatang met ti Domingo a market day dagiti laeng authorized persons outside of residence (APORs) manipud iti alas-sais ti agsapa agingga ala-una ti malem a sarunuen ti disinfection iti merkado publiko.
Maipalagip a mangrugi met iti alas-sais ti agsapa agingga alas-nuebe ti rabii manipod Lunes agingga Sabado ti operasyon dagiti negosyo sadiay La Trinidad.
Nag-epektibo ti nasao a market schedule idi kalman, Abril 12 ken agpaso inton Abril 30 ti agdama a tawen.
