Idagdagadag dagiti maseknan nga otoridad iti Buguias, Benguet Local Government Unit, Provincial Veterinary Office, Municipal Health ken dadduma pay nga opisina tapno mangipatungpal dagitoy iti nainget nga imbistigasyon kadagiti amin a panganan sadiay.
Daytoy ket kalpasan a nakaawatda iti report nga adda dagiti maatap nga agilaklako iti karne ti aso.
Dagus met a nagresponde dagiti otoridad partikular kadagiti panganan iti asideg ti UV Express Van Station, ngem awan ti nadanunanda a karne ti aso no sadino maatap a dagus a naidulin dagitoy.
Gapu iti daytoy, nagballaagda kadagiti agtagikua kadagiti panganan tapno saanda manen nga aramiden daytoy gapu ta illigal ti nasao a banag.
Maipalagip nga ti panaglako wenno panangiserve iti karne ti aso ket iligal kas maibasar iti Republic Act No. 8485 wenno ti Animal Welfare Act of 1998.
Maaw-awagan met ti presensya dagiti otoridad tapno ingetanda ti pangipatungpal iti nasao a linteg tapno maisardeng dagitoy nga iligal nga aktibidad.
