Imbinglay ni Dr. Celia Flor Brillantes , dadaulo ti the City Health Services Office (CHSO) nga adadda a pinaregtada dagiti ipatpatungpalda nga inspeksyon ken orientasyon kadagiti food establishment kagiddan iti panangipettengda kadagiti kanayunan pay nga addang a maipatungpal kadagiti sumarsaruno a bulan.
Sigun kenni Sanitation Inspector Miller Balisongen, nangrugi ti pest management campaign dagitoy idi Marso 17 iti agdama a tawen no sadino naaddaan iti technical orientation nga indaulon ti Environmental Health and Sanitation Division (EHSD) babaen metlaeng ti pannakitinnulong ti sumagmamano a licensed pest control providers.
Napasarunoan daytoy iti pormal nga inspeksyon iti agarup 38 supermarkets ken grocery stores a nangrugi idi Abril 14.
Impettengda dagitoy nga agingga ita ket maisaysayangkat latta dagitoy nga addang kas paset iti monitoring effort ti lokal a gobyerno ti siuadad.
Impakaaamo met ti nasao nga opisina nga agtultuloy agingga ita ti inspeksyonda iti slaughterhouse ti siudad.
Impakaammo ti Environmental Health and Sanitation Division (EHSD) a pinalawada ti Integrated Pest Management Program (IPMP) babaen iti addu nga orientasyon kadagiti nagduduma nga establisyemento a naisayangkat manipud Mayo agingga Hunyo no sadino nadanonda dagiti nagduduma a supermarkets, grocery stores, City Market Vendors, tenants iti kadakelan a mall iti siudad, ken food establishments.
Sigun iti nasao nga opisina, sigun iti resulta ti inspeksyon dagitoy, naduktalanda dagiti sumagmamano a seryoso a sanitation concerns no sadino naamuwanda nga awan kadagiti 38 a supermarkets ken groceries ti adda ti agdama a vermin abatement programna.
Bayat iti panaginspek dagitoy, naimatanganda dagiti addu nga ipes, otot (rat), ken nakitada dagiti narurugit nga storage ken kitchen areas, stocks a nakadiso kadagiti datar, ken produkto a dinadael dagiti otot.
Adda pay dagiti nakitada a nailaok a food items a naiyabay kadagiti insekto ken dadduma a physical hazards, a nangitunda iti pannakalarma ken danag iti nasao nga opisina.
Sigun kenni Balisonge, dagiti naimatanganda a kondisyon ken nagramot iti saan nga strikto a pannakaipatungpal kadagiti vermin control requirements.
Gapu iti daytoy, iti sidung ti updated Local Sanitation Code ti siudad ti Baguio, mabalin amin a food establishments a mangisumitir iti Annual Vermin Abatement Plan ken pagtalinaedenda ti kontratada kadagiti licensed pest control operations kas paset iti requirement iti panangalada wenno panangirenewda kadagiti sanitary permits dagiti negosyoda.
Iti sidung pay ti nasao a direktiba, maipataw ti kanayunan a pannusa kadagiti aglabsing pakairamanan ti P1,000 a multa para kadagiti establishment owners a mangala kadagiti empleyadoda nga awanan ti valid health certificates.
Sigun kenni Balisongen, kasla nagbalinen gamin a normal a parte ti biyag dagiti business owners ken empleyadoda ti saan a nadalus nga aglawlawa no sadinno kasla normal laengen kadakuada a makakitkita kadagiti ipes iti uneg ti establisyementoda a saan kuma a rumbeng.
Kabayatanna, mabalin met nga agisumitir dagiti residente ken consumer iti reklamo babaen iti Baguio City Health Services Office Facebook page nu adda dagiti makitada a food establishments a manglabsing ken saan nga agtungtunpal iti sanitation standards. //bombokaren.c.sapirao
