BAGUIO CITY – Naituding a maipaima iti lokal a konseho ti Baguio City ti napagnumuan a baro nga entrance fee para iti Botanical Garden iti kaleppas a public hearing.
Iti interview ti Bombo Radyo Baguio ken City Administrator Engr. Bonifacio Dela Pena, kinunana a naipangato ti entrance fee ti nasao a parke
Manipod iti P10 a general admission, dumanonen ita iti P50 ti entrance fee para kadagiti turista; P30 para kadagiti residente ken P10 kadagiti ubbing.
Dinakamatna nga adda iti diskwento para kadagiti natataengan a 20% ngem nasken a mangiparangda iti senior citizen ID.
![](https://img.bomboradyo.com/baguio/2022/03/275115740_668874501086536_5376306317954604662_n.jpg)
Nupay kasta, kinunana a magna pay daytoy iti panagtingiting ti lokal a konseho sakbay a maipatungpal.
Inlawlawagna a saan a puntirya ti pannakaipangato ti entrance fee nga agnumar ti syudad wenno pag interesan ti lokal a gobierno agsipod ta para daytoy iti maintance, operasyon ken kanayunan a development ti parke.
Inyunay unayna a dagiti makolektar a babayadan ket maaramat para laeng iti nasao a parke tapnu ad-adda pay a mapapintas ken makaguyuguy iti turista.