Sumagmamano a tonelada ti naipuslit a nateng manipod China ti nagpositibo iti “lead” ken “E.coli contamination.”
Dagiti nateng ket nakumpiskar manipod iti maysa a “warehouse” idiay Metro Manila idi Agosto, nga awanan ti “sanitary” ken “phytosanitary import clearance.”
Sigun kenni Bureau of Plant Industry Plant Product Safety Division chief William Mugot, saan a naipasidog dagiti nateng iti umno a proseso isut rason a saanda nga ammo nu kas ano a naidanon iti Pilipinas ken sadinno ti nagtaudanna dagitoy.
Iti kanayunan a panagsukimat,maiparparangarang a nakontamina iti pestisidio ken “heavy metals,” a saan a natalged iti salun-at ti maysa a tao.
Karaman kadagiti nateng a naimatangan ti “lead” ket carrots, bayat a ti kamatis ken sibuyas ket naduktalan nga addaan ti nangato nga E.coli, a mangipasimudaag ti posible a kontaminasion manipud iti rugit ti maysa a tao wenno indibidual.
Gapu iti dayta, imbalakad ti Bureau of Plant Industry dagiti “consumers” nga ugasan a nasayaat dagiti nateng sakbay nga iluto tapno maikkat a nalaing dagiti nabati a pestisidio ken “heavy metals.”
