BAGUIO CITY – Nainget latta ti panakaipatungpal ti kampanya kontra kadagiti colorum a lugan ditoy lokalidad.
Iti panakiuman ti Bombo Radyo Baguio, kinuna ni Land Transportation Office – Cordillera regional director Francis Ray Almora a paset daytoy ti serbisyoda kadagiti legal nga operators dagiti parapasahero a lugan tapnu masalwadan dagitoy manipud kadagiti pribado a lugan a makiag-agaw iti linya dagitoy.
Dinakamatna nga agarup innaldaw nga adda ti matiltiliwda a colorum ken kaaduan ditoy ket iti Benguet–Nueva Vizcaya Road wenno Baguio–Aritao Road malaksid pay iti Kennon Road, Marcos Highway ken iti Halsema Road.
Impannakkelna met nga awan ti matiltiliwda iti Naguilian Road gapu iti kainget ti border control iti deppaar ti Burgos ken Tagudin malaksid pay iti kalsada sadiay Irisan, Baguio City.
l
Linawlawagan met ni Almora a nainget amin ti border control kadagiti kalsada pastrek iti Baguio ngem adda latta dagiti dadduma a kalsada a mabalin a pagnaan dagiti matiltiliw a colorum a lugan.
