BAGUIO CITY – Impanamnama ni Police Brigadier General Ephraim Dickson, Regional Director ti PROCOR a karkaro pay na mairtengan ti kampania kontra iti panagmula ti marijuana ditoy Cordillera.
Impeksana daytoy kalpasan a naparot ken nauram ti P63.4 million a gatad ti marijuana iti nagduduma na paset ti rehion idi napalabas a lawas.
Kinuna ti opisial a kangrunaan a matutukan dagiti marijuana eradication ita a panagtutudo gapu ta nalaka nga agtubo dagiti marijuana.
Dinakamatna a tutukan met laeng ti pulisya ti pannakaduktal ti dadduma pay a marijuana plantation iti rehion tapno madalusan dagitoy ken maideklara a drug cleared dagiti babbarangay.
Innayon ni Dickson a babaen iti mas istrikto nga implementasion ti marijiuana eradication ket maksayan ti suplay ti marijuana iti rehion a mapapati na pagtataudan ti adu a suplay ti maipawil a mula.
