BAGUIO CITY – Nangipatungpalen ti Baguio City Jail – Male Dormitory iti Oplan Greyhound kadagiti selda sadiay.
Ti Oplan Greyhound ket maysa a kampanya kontra kadagiti iligal a droga ken kontrabando kadagiti uneg ken masakupan ti maysa a pagbaludan.
Naisayangkat ti nasao nga operasyon kasaruno ti pananggandat ti maysa a lalaki a mangiserrek iti iligal a droga iti uneg ti Male Dorm ti Baguio City Jail babaen iti sidaen.
Sigun kenni Jail Superintendent Mary Ann Tresmanio, Jail Warden ti nasao a pagbaludan, awan met ti nakitada nga aniaman a kita ti kontrabando iti uneg ti pagbaludan.
Impettengna nga agtaltalinaed a drug-free ti Baguio City Jail – Male Dorm ken awan pay ti nakauneg nga aniaman a kita ti iligal a droga.
Kinunana a nabilin metten dagiti response team ti Male Dorm iti panangsukimatda a nalaing kadagiti couriers ken dagiti aminen a maiserserrek iti uneg ti pagbaludan.
Kagiddan iti daytoy, impanamnamana a saanda a palubusan a mapasamak manen ti gandat a panangiserrek sadiay iti iligal a droga.
