Inlawlawag ti Korte Suprema a kasapulan a bayadan ti overtime dagiti security guard a mangmangged iti sidong ti broken period scheme nu ababa ti breaktime dagitoy nga araramatenda iti personal a kasapulan.
Iti maysa a desision nga insurat ni Associate Justice Henri Jean Paul B. Inting, imbilin ti Third Division ti Korte Suprema ti Seabren Security Agency (Seabren) a bayadan dagiti security guard a ni Lorenzo D. Cambila, Jr. ken Albajar S. Samad iti uppat nga oras a panaginanada, labes ti walo nga oras a regular nga oras ti trabaho dagitoy.
Intuding ti Seabren Security Agency (Seabren) iti Ecoland 4000 Residences dagiti security guard iti sangapulo ket dua nga oras a shift nga addaan ti uppat nga oras a break iti nagbaetan.
Gapu iti schedule, addaanda ti uppat nga oras a panagtigged, uppat a panaginana, ken uppat manen iti panagtigged.
Iti sidong ti Omnibus Rules Implementing the Labor Code, dagiti break ket maibilang nga oras iti panagtigged nu daytoy ket ababa unay para iti personal a pannagaramat dagiti mangmangged.
Kinuna ti Korte Suprema a maibilang koma nga oras ti panagtigged ti uppat nga oras a panagsardeng iti nagbaetan dagiti shift gapu ta saan met a mausar dagiti guardia dayta nga oras para iti bagbagida.
Saan a praktikal ken nagastos para kadagiti minimum wage security guard a pumanaw iti trabaho, agawid, ket kalpasanna agsubli iti isu met laeng nga aldaw.
Innayon ti Korte a ti “broken period scheme” nga impatungpal ni Seabren ket nadisenio tapno maliklikan dagiti linteg ti Labour ken overtime pay.
