Naituding nga iwaras ti gobierno ti Pilipinas ti nalaka a bagas nga agingga iti P36 ti maysa a kilo kadagiti local government units a mailako kadagiti masakupanda nga umili.
Sigun kenni San Juan Mayor Francis Zamora, nakipagsaritan ti Metro Manila Council kenni Agriculture Secretary Francisco Tiu Laurel ken dadduma pay a nangangato nga opisial maipapan iti panangiwaras ti P36 tunggal kilo a bagas.
Immunan a kinuna ti Department of Agriculture nga i-roll out da ti dua a nalaklaka ken nasalun-at a barayti ti bagas para kadagiti Pilipino, a maawagan iti “Sulit Rice” ken “Nutri Rice,” kas paset ti agtultuloy a panagregget a mangpababa iti presio ti bagas kadagiti lokal a merkado.
Iti maysa a report, kinuna ni DA Spokesperson Assistant Secretary Arnel De Mesa a ti Sulit Rice, nga inladawanna kas siento porsiento a “broken white rice,” ket mailako iti lokalidad manipod iti P35 agingga P36 tunggal kilo, bayat a ti Nutri Rice, nga inladawanna kas nagbaetan ti “well-milled” ken “brown rice” ket mailako manipod iti P37 agingga P38 tunggal kilo.
Kinuna ni Zamora a dumanon iti 300,000 a tonelada ti stock a bagas ti National Food Authority.
Kabayatanna, kinuna ni Zamora a patien ni Secretary Laurel a bummaban ti presio ti bagas inton bulan ti Marso.
