BAGUIO CITY-Manamnama ti nagduduma a serbisyo a maiyasideg para kadagiti umili babaen iti pannakitinulong dagiti nagduduma a barangay iti Baguio City inton umay a tawen.
Pakairamanan dagiti maipaay a serbisyo ti Community Tax Certificate wenno cedula, professional Tax Receipt, Police Clearance para iti lokal ken abroad, working permit ken residential garbage fee.
Iti pannakiuman ti Bombo Radyo kenni Barangay Affairs Assistant Executive Secretary Benjamin Macadangdang, daytoy a serbisyo ket epektibo inton January 3, 2023.
Sigun pay kenkuana, daytoy ket pammilin ti City Treasurer Office tapno saan a marigatan dagiti contituents a makipila iti City hall.
Kinunana metlaeng a nakasaganan dagiti barangays para iti nasao a serbisyo iti umuna a kuarter ti tawen.
Kasta met, maikonkonsidera pay ti pananglukat wenno availability dagitoy a barangays iti Sabado ken Dominggo tapno maakomodar dagiti umili a saan a makabael iti weekdays.
Kabayatanna, agtutultutloy ti monitoring panagtulnog dagiti Barangay maipapan iti Anti-road obstruction iti siudad bayat ti umadanin a paskua.
Agtultuloy metlaeng ti pannakitinulong ti Public Order and Safety Division (POSD) ken City Engineering Office para iti pannakaiyurnos ken panangipaay ti parking area kadagiti bisita ken daduma pay.
