Pagparparikutan ita ti munisipyo ti Buguias ti kinaadu ti bilang ti animal bite cases a tamtamingenda iti tunggal bulan.
Iti panakiuman ti Bombo Radyo kenni Cristina Arsing Sanio, Health Program Coordinator ti Rabies, Deworming ken Care of Respiratory Infection and Diarrheal Diseas Program iti probinsya ti Benguet, kinunana a maysa a makaigapo iti adu unay a bilang dagiti tamtamingenda ti kinaawan ti Animal Bite Treatment Centers kadagiti kabangibang a munsipyo kas iti Mankayan ken iti Kibungan.
Sigun kenni Sanio, iti Animal Bite Treatment Center ti Buguias ti pakaiturturungan dagiti indibidwal manipod Mankayan ken Kibungan a nakagat iti aso wenno pusa a masapol a mataming.
Mainaig iti dayta, impudno pay ti opisyal a pakaseknanda metlaeng ti kinakurang iti personnel wenno staff iti nadakamat a pasilidad gapu ta mabusbusbosda ti pondo iti panangtamingda kadagiti inidbidwal a maaramat kuma para iti panakanayon iti staffda.
Innayon ni Sanio a pinadasdan a kinapatang dagiti healthcare workers kadagiti munisipyo iti Mankayan ken Kibungan ngem sigun kadakuada, saan dagitoy a makabukel iti Animal Bite Treatment Center gapu metlaeng iti kinakurang ti staff dagitoy.
Iti sabali a bangir, palpalgipan met ni Sanio dagiti pet owners nga agbalin dagitoy a responsable iti panagtarakenda kadagiti dingwen tapno maliklikan ti panag ngato ti kaso ti rabies iti probinsya ti Benguet.
Innayonna pay a ti kagat ti aso ken “karamot” ti pusa dagiti kangrunaan a kaso a mailislista iti sangapulo ket dua a munsipyo ti probinsya ti Benguet.
Maipalagip nga iti maikatlo a kwarter ita a ket nakailista ti nadakamat a probinsya iti nasurok dua ribu nga animal bite cases.//Bombo Gen Depayso
