Agtultuloy ti panagadu ti bilang dagiti turista a sumarsarungkar iti nagduduma a parke nga ipampannakkel ti siudad ti Baguio.
Sigun ken ni PSI Juluis Basinga, station commander ti Baguio City Police Office Station 3, manipud nangrugi ti Ber Months ket karkaro pay nga immadu dagiti turista a nagpasiar kadagiti parke iti masakupan dagitoy a lugar a pakairamanan ti Wright Park, Mines View Park ken Botanical Garden.
Nupay kasta, inaklonna a kagiddan ti panasaranta ti turismo ket immilet ti gunay ti trapiko nangruna kadagiti kalsada a paturong kadagiti nagduduma a tourist destination iti siudad.
Impanamnama ti BCPO ti agtultuloy a pannakaipaay ti police visibility para iti pannakaipaay ti tulong kadagiti turista ken umili ken iti pannakaiwanawan ti gunay ti trapiko bayat nga umas-asideg ti bulan ti Disiembre.
