BAGUIO CITY – Mapalawa pay ti paperless transaction kadagiti major border checkpoints pastrek iti Baguio City, babaen iti QR Code nga immunan a naipatungpal para kadagiti turista a napalubusan a sumrek ditoy siudad.
Sakupen ti baro a pagalagadan dagiti returning Baguio residents, returning OFWs ken dagiti addaan ti napateg a transaksion wenno negosyo ditoy Baguio.
Maikalkalikagum ti panagparehistro nga umuna dagiti agturong iti Baguio babaen iti online tapnu sadiay nga i-upload dagiti kasapulan a dokumento, pakairamanan ti negatibo a resulta ti COVID-19 test a naala iti 30 nga aldaw sakbay ti naituding a panagbiahe paturong iti siudad.
Apaman a maaprobaran ti aplikasyon ti maseknan ket maipaayan daytoy iti QR Code nga aramaten wenno iparangda iti border checkpoint.
Nainget met a suksukimaten dagiti pulis dagiti dokumento dagiti sumsumrek iti siudad babaen iti pribado ken parapubliko a lugan tapnu makita no pudno a residente dagitoy ti Metro Baguio ken karamanda kadagiti mabalin a makastrek ditoy siudad.
Iti agdama ket nakagatangen ti lokal a gobyerno iti QR Code scanners a maiwaras kadagiti pulis nga agbambantay kadagiti border checkpoints pastrek iti Baguio City.
