BAGUIO CITY – Impakaamo ti National Authority for Child Care (NACC) ti proseso ti panag-ampon babaen iti naururnos ken naparpartak a proseso.
Sigun kenni Janella Estrada, ti Executive Director ti National Authority for Child Care gapu iti daytoy ket ad-ado payen dagiti Pilipino nga interesado nga ag-ampon.
Impeksana pay a ti Republic Act 11642 ti nangbukel iti National Authority for Child Care nu sadinno maidalan iti administrative process ti panag-ampon.
Inlawlawagna a rumbeng nga umasideg ti adoptive parent (ti agampon a nagannak) iti opisina ti Department of Social Welfare and Development para iti matching ken placement ti ubing.
Kalpasan dayta, iproseso ti korte ti judicial adoption ken maipaulog ti order of adoption.
Impettengna pay nga awanen ti trial court a mapasamak iti proseso ti panag-ampon gapu ta nabayag daytoy.
Sigun met kenni Feliza Singlan, Officer-in-Charge iti Regional Alternative Child Care Office – Cordillera, iti agdama dumanon iti 31 ti parent applicants, 37 ti naka-petition para iti adoption, 11 ti na-aprobaran nga orders of adoption ken 17 ti maur-uray nga orders of adoption.
Innayonna pay a maipaspasidong dagiti adoptive parent ken foster parents iti na-ananay a panagsagana.
Iti agdama, sigun kenni Imelda Ronda, dadaulo iti NACC’s Domestic Adoption Division, dumanon iti 1,424 ti bilang dagiti ubbing a naideklara a mabalin a ma-ampon iti pagilyan.//Bombo Mae Bagsang
