BAGUIO CITY – Dinayaw ni National Task Force against COVID-19 chief implementer ken Vaccine Czar Carlito Galvez Jr. ti napartak a panagbakuna kontra iti COVID-19 ditoy siudad ti Baguio.
Kinunana a nalaing ti liderato ti siudad gaputa uray limitado ti bakuna kontra iti COVID-19 ket nailistan ti Baguio ti 88.93% a naka-awat ti first dose ken 71.06% a fully vaccinated manipud iti 281,000 nga eligible population ti siudad.
Dinayawna metlaeng ti panangiraman ita ti Baguio kadagiti residente ti La Trinidad, Itogon, Sablan, Tuba and Tublay Area iti panagbakuna kontra iti COVID-19.
Dinakamatna pay ti naobserbaranna a napartak a panagbakuna ditoy Baguio kabayatan ti panagbisitana iti ceremonial vaccination ti pediatric population idi kalman.
Impeksana metlaeng ti inanamana nga agbalin a pagwadan ti Baguio, saan laeng nga iti Contact Tracing ngem ketdi, uray pay iti agresibo a panagbakuna kontra iti COVID-19.
Kabayatanna, tinagiragsak ni Secretary Galvez ti naobserbaranna nga kaawan panagduadua wenno panagkedked kadagiti menor de edad a nagpila tapnu agpabakuna kontra iti COVID-19 idi kalman.
Impeksana metlaeng ti kinaragsak ti National Task Force against COVID-19 iti panagadu ti bilang dagiti agtutubo ti pagilian a karaman iti pediatric population nga agpabpabakuna kontra iti COVID-19.
Maibasar iti datus ti opisyal idi Huwebes, dimmanon iti 58,000 a kameng ti pediatric population ti nakaawaten ti first dose ti bakuna kontra iti COVID-19.
Maibasar met iti datus ti Baguio LGU idi kalman ket 3,146 a kameng ti pediatric population ti naka-awat iti first dose ti COVID vaccine dagitoy.
Gapu iti daytoy, manipud nangrugi ti panagbakuna iti pediatric population idi October 29 ket pakabuklanen a 9,735 wenno 22.73% ti 42,811 nga eligible population dagiti 12-17 years old ti nakaawat ti fist dose ti bakuna.
Naamuan a 1,525 ti addaan comorbidities bayat nga 8,210 ti awanan ti aniaman a comorbidities.
Manamnama met nga umado pay ti bilang dagitoy kalpasan nga insingasing dagiti estudyante nga addaan ti online class iti weekdays ti panagbakuna kadagitoy iti weekend.
Maipalagip a nasken nga adda ti pammalubos ti nagannak kadagiti nasao nga agtutubo sakbay ti panagpabakuna dagitoy.
