BAGUIO CITY – Patien ti City Health Officer ti Baguio a ti napartak a panagngato ti kaso ti siudad iti COVID-19 ket gapu iti kaaddan ti Delta variant ti COVID-19 iti lokalidad.
Iti panakiuman ti Bombo Radyo Baguio kenni Dr. Rowena Galpo, dinakamatna a ti innem a kumpirmado a kaso ti Delta variant iti siudad ket nagtaud iti resulta dagiti samples a naisumitir iti Philippine Genome Center.
Kinunana a gapu iti daytoy, maibaga a posible nga ad-adu pay dagiti nagpositibo wenno nakaptan iti nasao a variant ti coronavirus a mangituntunda ita iti panagngato ti kaso ti COVID-19 iti siudad.
Impettengna nga iti kapadasan ti dadduma a pagilian ket napartak ti panagwaras ti Delta variant.
Innayonna pay a nasken a maalarma ti siudad gaputa saan a normal ti agdama a panagngato ti kaso ti COVID-19.
