Impakaamo ni House of Representatives Speaker Martin Romualdez a napartak ti panaggarawda kadagiti nabati a napateg a gakat, agraman ti Anti-Philippine Offshore Gaming Operations Bill sakbay nga agleppas ti 19th Congres.
Iti panagsubli ti session ti Kamara ita nga aldaw, kinuna ni Romualdez a karaman kadagiti pagtalantananda iti final reading ket ti House Bill No. 10987 wenno ti Anti-Offshore Gaming Operations Act.
Sigun iti nasao nga opisial, panggep ti nasao a gakat a risuten dagiti pakaseknan iti krimen, kurapsion, ken national security a mainaig iti offshore gaming operations.
Malaksid iti nasao a gakat, ti nakalinia para iti final reading ket ti HB 11359 wenno ti Philippine Civil Registry Act; HB 11430 wenno ti Declaration of State of Imminent Disaster Act; HB 11395 wenno ti Act Institutionalizing Emergency Assistance for Individuals in Crisis; ken HB 11400 wenno ti singasing a mapalawa dagiti benepisio ken pribilehio para kadagiti senior citizens.
Pinagyamanan ni Romualdez ti achievement ti lower chamber iti pannakaipasa ti duapulo ket pito a gakat manipod iti duapulo ket walo iti sidong ti Common Legislative Agenda bayat ti maika-walo a panagtaripnong ti Legislative-Executive Development Advisory Council.
Nabaelan a mangipila ti Kamara iti 13,868 a gakat ken resolusion iti nagbaetan ti July 25, 2022 ken May 28, 2025.
Manipod iti nasao a bilang, 11,506 ti gakat bayat a 2,361 ti resolusion.
