BAGUIO CITY- Impanamnama ti lokal a gobierno ti Baguio City ti napartak a panag aksyon ken panagsungbat kadagiti awag a dumandanon iti Baguio 911 hotline ti Smart Command Center nga ag-op-operate iti uneg ti biente kwatro oras.
Impatalged daytoy ni Baguio City Administrator VJ Cawis kagiddan iti nagbalin nga isyu ken pannakababalaw ti Unified 911 on call ti nasyunal a gobierno gapu iti nabuntog ken saan a nasayaat panagsungbat da iti emergency call ti maysa a caller.
Agserserbi kas command center ti Baguio City Police Office , Emergency and Medical Services, City Disaster Risk Reduction and Management Office, Bureau of Fire Protection, Philippine Red Cross Baguio Chapter ken 911 on Call Rescue group ti Smart Command and Control Center a masarakan idiay Baguio Convention Center.
Sigun pay iti opisyal, iti tunggal emehensiya a maiyun-uman kadakuda ket dagus a maipadanon kadagiti frontline groups para iti napaspas a panagresponde kadagiti indibidual nga agkasapulan ti tulong ken assistance.
Ti Baguio Smart City Command Center ket maysa nga integrated digital governance ken emergency response framework nga addaan iti advance ken moderno a teknolohiya aramat ti Artificial Intelligince.
Karaman kadagiti kagawaan iti nasao a pasilidad ti high-resolution nga intelligent CCTV nga addaan iti automatic facial recognition ken real-time vehicle license plate tracking.
Dagiti personnel ditoy ket konektado iti Hytera three-way communication unit malaksid pay iti Video Management System, Computer-Aided Dispatch, Geographical Information System, Big Data Analytics System ken dadduma pay.
