BAGUIO CITY – Ikonkonsidera ti Department of Education (DepEd) – Cordillera ti panangiramanda iti enhanced nutribun wenno e-nutribun iti feeding program ti nasao nga ahensia.
Imbinglay daytoy ni Dr. Nancy Bantog, regional director ti Department of Science and Technology (DOST)-Cordillera kagiddan ti panakaiyusuat ti e-nutribun iti Baguio City, Apayao, Kalinga ken Mountain Province.
Kinunana a kidkiddawenda met ti panangiraman ti DSWD iti e-nutribun iti feeding program daytoy.
Dinakamatna a nakaaramid ti DOST-Food, Nutrition and Research Institute (FNRI) iti nutribun nga addaan ti ad-adu a micronutrient a makaay-ayo iti panagraman, nangruna kadagiti ubbing.
Innayonna nga adda pay dagiti baro a variants kas iti kalabasa ken karot, malaksid pay iti sumarunonto a variant ti malunggay a mangrisut iti kinakurang ti Vitamin A ken iron kadagiti Pilipino.
Immuna metten nga inyusuat ti DOST-FNRI ti kamote a variant ti e-nutribun.
Imbinglay ni Dr. Bantog nga italtal-oda metlaeng ti e-nutribun kadagiti lokal a gobyerno nangruna kadagiti sumagmamano a bakeshops a mangad-adaptar iti nasao a produkto kas regular a lako dagitoy.
Impannakkelna a saan laeng a makaipaay iti nutrisyon ti e-nutribun ngem ketdi, matulongan pay dagiti bakery adopters a maaddaan ti kanayonan a kustomer.
