BAGUIO CITY – Impannakkel ti ama ti Baguio a napintas ti contact tracing effort ti lokal a gobierno ti siudad.
Sigun kenni Mayor Benjamin Magalong, nainget a matuttutukan ti contact tracing ti siudad tapno malapdan ti panagwaras ti COVID-19 iti lokalidad.
Imbinglayna a babaen iti epektibo a contact tracing ket naduktalan ti dumanon 93 a nakapulapol ti maysa a kaso ti UK variant ditoy siudad bayat a naduktalan met ti nasurok 130 a nakapulapol ti maysa pay a kaso ditoy siudad.
Inyunay-unayna a nasken a matutukan ti contact tracing efforts tapno naan-anay a mabigbig dagiti nakapulapol dagiti positibo iti COVID-19 ken makontrol ti panakaiwaras ti virus.
Impettengna metlaeng a napateg ti nainget a border control tapno maliklikan ti panaggaraw dagiti tattao tapno saan la unay a ngumato dagiti kaso ti COVID-19.
Kabayatanna, inwaragawag ni Mayor Magalong a maipawilen ti fist bump gaputa mabalin latta a maiyakar ti virus babaen iti daytoy kas maibasar iti naawatna nga impormasyon manipud iti panakitaripnongna iti World Health Organization idi napalabas a lawas.
Sigun kenkuana, inrekomendar met ti organisasyon ti elbow bump a kasukat ti fist bump.
