BAGUIO CITY – Tinagiragsak ti Department of Health-Cordillera ti napintas a resulta ti vaccination rollout iti rehion Cordillera.
Sigun kenni DOH-CAR Assistant Regional Director Dr. Amelita Pangilinan, maysa ti rehion a naipaayan iti ado nga alokasyon ti bakuna a mangipakpakita a nangato ti acceptability dagiti Cordilleran.
Manipud iti entero a rehion, dinakamatna a nailatang ti 40% a bakuna iti Baguio City gaputta karaman daytoy kadagiti high risk areas ken nangato a health care utilization rate.
Kabayatanna, kinuna ni Pangilinan a nabuntog ti panakaaramat dagiti bakuna iti Benguet isu’t gapuna a nababa ti alokasyon a maipapaay sadiay ngem mangnamnama a manayonan itan ti alokasyon gaputta naobserbaran ti in-inot a panagngato ti bilang dagiti umili nga agpapabakuna iti nasao a probinsia.
Kidkiddawenna met ti panag-anus ken panakaawat dagiti saan pay a nabakunaan nga umili kagiddan ti panangipanamnama a mairamanda iti sumarsaruno a vaccine roll-out iti rehion Cordillera.
