Impeksa ni Baguio City Councilor Betty Lourdes Tabanda, mangidadaulo iti Social Services, Women & Urban Poor iti Baguio City Council nga adu dagiti nakitana a napipintas nga agenda idi kalman babaen kadagiti senior citizens a nagtugaw kadagiti nagduduma nga opisina iti lokal a gobyerno iti siudad ti Baguio.
Daytoy ket kalpasan iti naipatungpal a Senior Citizen Official for a Day (SCOFAD) idi kalman no sadino nagtugaw kas opisyales dagiti sumagmamano a senior citizens kadagiti nagduduma nga opisina dagiti opisyales iti siudad kas paset iti pannakaselebrar iti Elderly Filipino Month.
Iti pannakiuman ti Bombo Radyo kenni Baguio City Councilor Betty Lourdes Tabanda, impeksana nga addu dagiti napipintas nga insingasing dagiti SCOFAD a saanda pay laeng a nataltalantan iti City Council.
Inlawlawagna met a dagiti naaprobaran idi kalman iti session dagiti SCOFAD ket maisumitir iti City Secretary ken daytoy metten ti mangirefer kadagiti nasao a gakat kadagiti maseknan a komite iti lokal a gobyerno.
Ditoy metten nga adalen dagiti nagduduma a komite dagiti singasing ket nu makitada a naurnos ti nasao a gakat, ipa-aaprove dan daytoy idiay council.Impeksana a maysa kadagiti kayatda nga iparikna kadagiti senior citizen ket ti ‘self worth’ tapno mariknada nga adda pay laeng dagiti kabaelanda nga aramiden uray no senior citizen dagitoyen.
Kabayatanna, imbinglay ni Councilor Tabanda nga addan ti naaprbaran nga ordinansa a mangnayon kadagiti social pension beneficiaries iti siudad a badayan ti lokal a gobyerno ti Baguio City.
Inlawlawagna a mangnayunda iti 500 pay a benepisyaryo iti social pensioners iti sidung ti programa iti siudad no sadino agpay-out da metten inton umay a lawas.
Inlawlawag metlaeng ti nasao nga opisyal a dagiti benepisyaryo iti nasao a programa ken dinmalan iti evaluation. Namnamaenna met a maipaay kadagiti pudno nga agkasapulan dagiti agbalin a benepisyaryo iti locally-paid a pension. //kcs//
