BAGUIO CITY – Dukduktalen ti Scene of the Crime Operatives (SOCO)-Baguio nu asino ti nangibelleng iti naputed a saka ti tao iti maysa a creek sadiay Tuding Road, Outlook Drive, Baguio City itay laeng agsapa.
Sigun kenni Dr. Rodrigo Leal, medico-legal-officer ti SOCO-Baguio, nangalada iti DNA samples iti nasao a saka sakbayda nga inturong daytoy iti maysa a puneraria.
Kinunana a makikoordinarda met laeng iti Baguio General Hospital and Medical Center tapno mammuanda nu adda ti nagbalin a pasiente dagitoy a naputdan iti saka.
Inlawlag ni Dr. Leal nga addaan iti sakit a diabetes ti akinsaka iti daytoy kas maibasar iti langa ti nasao a saka.
Kinunana a nasken a makasuan nu asinoman ti nangibelleng iti nadakamat a saka gapu nabatad a panaglabsing daytoy iti sanitation code ti siudad.
Innayunna a nasken a maikali a naimbag dagiti maputputed a paset ti bagi ti tao gaputa nu saan ket posible a mangiyakar dagitoy iti nagduduma a sakit.
