BAGUIO CITY – Imbinglay ti maysa a kailian a soldado ti rigat ti napasaranda kabayatan ti panakilablabanda iti Maute local terror group sadiay Marawi City.
Iti panakiuman ti Bombo Radyo kenni Corporal Romnick Estacio, a tubo ti Ifugao ken La Union, kinunana a maysa kadagiti saanna a malipatan a pagteng ket ti ipupusay ti maysa a kadwada kalpasan a pinabettakan iti bomba dagiti terorista ti tropa dagitoy.
Inyistoryana a kalpasan a naalada ti bangkay ti kadwada ket narigatanda met laeng a nangispal iti kadwada a napabettakan ti sakana.
Nupay kasta, inkagumaan ti kadwada a nagkaradap agingga nga ingguyodna daytoy iti nataltaled a lugar.
Kinunana a saanda a ninamnama nga asideg laeng ti ayan dagiti kalaban ken pader laeng ti nagbaetan dagitoy.
Dinakamatna met a kabayatan ti panakilablaban dagitoy ket natamaan daytoy iti shrapnel isut gapuna a naginana iti tallo a lawas sakbay a nagsubli manen iti war zone.
Kinunana a narigat ti kasasaadda sadiay gaputa nakataya ti biag dagitoy.
Ni Corporal Estacio ket naidetino iti Jolo, Tawi-tawi ken Cotabato ngem naidestinoda sadiay Marawi kas augmentation force ti government troops idi bulan ti Hunyo.
