Pabor dagiti Barangay ken Sangguniang Kabataan Officials iti panaka-aprobar iti gakat a mailaylayon agingga iti uppat a tawen ti panagtakem dagiti mabutusan nga opisyales manipod iti agdama a tallo laeng a tawen.
Itay laeng nabiit ket inaprubaran ti Senado ti nasao a gakat bayat ti maikatlo ken pinal a panakaibasana.
Maipalagip a ti immuna a naisingasing para iti panakailaylayon ti panagtakem dagiti local officials ket innem a tawen iti dua a termino ngem iti agdama ket masursurot ti tallo a tawen iti dua a termino.
Iti panakiuman ti Bombo Radyo kenni Baguio City Councilor Rocky Aliping, kinunana a maur-uray paylaeng ti bersyon ti lower house para iti nasao a gakat.
Kalpasan dayta, mapasamak ti joint session ti lower ken upper house sakbay a maiturong daytoy iti Office of the President para iti panagpirma ni President Ferdinand “Bongbong” Marcos Jr. tapno agbalin daytoy a linteg.
Sigun kenni Aliping, nakita ti Senado nga ababa a panawen iti panagtakem dagiti Barangay ken Sangguniang Officials nangruna kadagiti opisyal a nakatugaw iti agdama gapu ta idi December 2023 a nabutosan dagitoy ken Enero idi tawen 2024 a nag-assumeda iti posisyon rason nga arigna dua laeng a tawen ti panagtugawda kas opisyal.
Kinuna pay ni Aliping nga iti napasamak a transisyon idi napalabas a Barangay ken Sangguniang Kabataan Elections ket pasig a seminars ken orientations ti napasamak rason nga ita laeng a tawen a maiyimplementarda dagiti plano ken programa dagitoy.
Mainaig iti dayta, rumrumwar met a maysa a pakaseknan iti narigrigat a panagsukat kadagiti mabutusan nga opsiyales kaspangarigan maobserbaran dagiti constituents a saan dagitoy nga ar-aramiden dagiti pagrebbenganda wenno dagiti maduktalan nga agkurkurakot.
Nupay kasta, kinuna ti opsiyal a mabalin latta a marisut daytoy babaen kadagiti sumagmamano a wagas maitunos iti nakalanad iti Local Government Code a mabalin a pangibasaran iti panangterminate kadagiti maseknan nga opisyales.//Bombo Mera Pacpacan
