BAGUIO CITY–Immapela ni COMELEC- Baguio Election Officer John Paul Martin kadagiti amin a kandidato iti nasapa a panangipila dagitoy iti Certificate of Candidacy (COC) sakbay iti maudi nga aldaw iti panangipila ti nasao a sertipikasyon.
Sigun kenni Martin, kasapulanda ti naan-anay a panawen a mang-fill up iti COC form tapnu maliklikanda nga agkamali kadagiti ikargada nga impormasyon.
Innayunna a nasken a suruten dagiti agkandidato iti umno a format iti panangfill up ti COC tapnu maliklikan iti panakadiskwalipikar dagitoy.
Kinunana a nasken a pirmaan dagiti agkandidato ti pito nga orihinal a kopya ti COC ken kasapulan a maipanotary daytoy iti abogado.
Malaksid iti daytoy, kasapulanda a mangisumitir iti original passport size ID ken documentary stamp.
Maipalagip a mangrugin inton Oktubre 11 agingga 17 ti panangipila dagiti kandidato iti COC.
