BAGUIO CITY- Iyap-apela ti COMELEC-Baguio ti nasapa a panagipila dagiti addaan panggep nga agkandidato iti barangay ken sangguniang kabataan elections iti certificate of candidacy (COC) dagitoy.
Iti panakiyuman ti Bombo Radyo kenni Atty. John Paul Martin, election officer ti siudad ti Baguio, kinunana a mangrugi ti makalawas a panagpila ti COC inton April 14 ken agleppas daytoy inton April 20.
Ipalpalagipna met a nasken a kompleto dagiti amin a datus ken dadduma nga ikalkalikagum ti COC.
Sigun kenni Martin, babaen iti nasapa a panagpila iti COC ket maliklikan ti atiddog a pila kabayatan ti maudi nga aldaw para iti daytoy wenno inton April 20.
Innayonna nga iti kaadu ti bilang dagiti posible nga agkandidato iti siudad ket innaldaw a 300 a tattao ti mabalin nga agpila iti kandidaturada iti opisinada.
Kabayatanna, innayon ni Atty. Martin nga iti panagrugi ti COC filing ket mangrugi metten ti election period isut gapuna a marugian metten ti PNP-COMELEC checkpoints ken gun ban manipud iti parbangon ti April 14.
