BAGUIO CITY – Maibalbalakad ti nasapsapa a panagdalus ken panagsarungkar ti publiko kadagiti minatay dagitoy iti nagduduma a sementerio ditoy siudad ti Baguio.
Kasaruno daytoy ti impormasion a posible a saan a mailukat dagiti sementerio ditoy lokalidad iti kaaldawan ti Undas gapu iti epekto ti pandemya nga ituntunda ti COVID-19.
Iti interview ti Bombo Radyo Baguio, kinuna ti maysa kadagiti caretaker ti Baguio Public Cemetery a masarakan sadiay depaar ti Naguillian Road a nasaysayaat no ita paylaeng ket agturongen sadiay sementeryo dagiti residente tapno maliklikan ti panagsisineksek dagitoy apaman a mapalubosanda a manglukat inton Nombyembre.
Imbinglayna a nasapa dagitoy a nagsagana sadiay Baguio Public Cemetery no sadino dinakamatna nga 80% a nadalusanen ti uneg ti sementeryo.
Innayona nga ipatungpalda ti One Entry, One Exit nga iskima iti sementerio inton Nobyembre tapno saan a mapukaw ti social distancing ken nainget a bantayanda dagiti agturong sadiay tapno agdalus kadagiti tanem.
Inyunay-unay pay ti caretaker a saan a mapalubosan dagiti agilako iti kandela ken sabong iti naglikmutan ti sementerio kas nailanad iti pammilin ti City Environment and Parks Management office (CEPMO).
Daytoy ket adda pakainaigana iti mapaspasaran a pandemya no sadino kasapulan ladta a maital-o ti proteksion ti publiko kontra iti COVID-19 infection.
Immuna metten a kinuna ni Mayor Benjamin Magalong a manarimaan itan ti communication plan ti lokal a gobierno para iti rehabilitasyon dagiti sementerio ditoy lokalidad kalpasan a kinunana a saan a sistematiko ti panakaimanehar kadagitoy.