Pinalagipan iti City Veterinary and Agriculture Office iti panangidaulo ni Dr. Silardo Bested dagiti pet owners nga agridam iti panangaywan iti aso ken pusada ita a napudot ti panawen.
Sigun kenni City Veterinary and Agriculture Office Veterinarian I Dr. Hynden Luma-ang, liklikan ti panangipagna kadagitoy nu nangato ti init ken ipasigurado nga adda ti pagturuganda dagitoy wenno ‘cool area’ kadagiti taraken nga ayup.
Dinakamat metlaeng ti nasao nga opisial ti maipapan iti microchipping, a tumultulong iti pannakabigbig dagiti taraken nu kaspangarigan maawan dagitoy.
Numan pay sigud a mandatory, “optional” laengen daytoy iti sidong iti baro nga ordinansa.
Agtultuloy metlaeng ti panangisayangkat ti nasao nga opisina iti panagkapon wenno spaying ken neutering, a mairekrekomendar iti tawen nga innem a bulan agingga iti tallo a tawen, ken adda iti requirements a kas iti bakuna kontra iti rabies ken pet registration.
Adda metlaeng ti schedule a panagkapon kadagiti barangay, nga addaan iti limit a dua a taraken iti tunggal balay.
Iti panangrambak iti Rabies Awareness Month ita a Marso, patien ti nasao nga opisina a babaen iti umno a bakuna, accessible veterinary care,ken microchipping, ad-adda a mapasayaat ti kinatalged dagiti ayup ken komunidad iti siudad.
