BAGUIO CITY – Kabaelan latta ti Baguio nga imaton ken makontrol dagiti turista a mapalpalubusan a sumrek ditoy siudad kagiddan ti panakabaliw dagiti pagalagadan iti panagawat kadagiti turista a naan-anay a nabakunaan kontra iti COVID-19.
Impanamnama daytoy ni Atty. Althea Alberto, Executive Assistant IV iti City Mayor’s Office ti Baguio iti panakiuman ti Bombo Radyo Baguio.
Sigun kenkuana, kabaelan ti Baguio a maimaton ti 3,000 a tourist arrivals iti innaldaw nangruna ta umdas dagiti personnel kadagiti tallo a triage centers ditoy siudad malaksid pay iti bukod a triage units dagiti sumagmamano a hotels iti lokalidad.
Innayonna a ti laeng panagadu dagiti turista ditoy siudad ket tunggal weekend laeng ken addan ti sistema kadagiti triage centers tapnu maakomodar dagiti dadduma a kliyente no napunnon ti maysa kadagiti triage centers.
Maipalagip nga inkalintegan ni Mayor Benjamin Magalong a ti panagtalinaed ti 3,000 a limitasyon iti bilang dagiti turista a mapastrek iti siudad iti innaldaw ket paset ti addang ti lokal a gobyerno iti in-inot ket natalged a panakabiag ti industriya ti turismo ti Baguio.
Dinakamatna pay a saan pay a limmabes ti tourist arrivals ti siudad manipud iti naituding nga innaldaw a limitasyon manipud June 1 gaputa ti tourist arrivals tunggal weekdays ket dumandanon laeng iti 1,500 agingga 1,800.
