BAGUIO CITY – Nagala ti lokal a gobyerno ti Baguio iti 300 nga indibidual a tumulong kadagiti babbarangay iti screening wenno panakapili dagiti pamilya ditoy siudad nga apektado iti manarimaan nga Enhanced Community Quarantine ken kwalipikado nga agnumar iti Social Amelioration Program ti gobyerno.
Sigun kenni Mayor Benjamin Magalong, babaen iti daytoy ket mapapartak ti screening ken panakabigbig dagiti kwalipikado a benipisaryo para iti dagus a panakaipaluspos ti tulong pinansial.
Dinakamatna a manamnama a 45,000 a pamilya ditoy siudad ti agnumar iti nasao a programa isut gapuna a nasken nga adu met ti agtrabaho para iti panakapili ken panakaiyawat ti tulong kadagiti benipisaryo.
Innayonna nga agaramatda ti website database para iti listaan dagiti benipisaryo a mabalin nga i-access ti DILG ken DSWD.
Sigun pay kenni Mayor Magalong, babaen iti database ket maimbentaryo ken marepaso ti listaan dagiti pamilya nga agnumnumar iti nagduduma a programa ti gobyerno babaen iti DSWD ken DOLE kabayatan iti Enhanced Community Quarantine.
Inlawlawagna a babaen iti daytoy ket makita no asino dagiti pamilya a kwalipikado kadagiti dadduma a tulong ken no asino dagiti makaaw-awaten ti tulong.
Kinuna pay ti sigud a heneral a kabayatan ti panakaimbentaryo dagiti agnumar iti Social Amelioration Program ket maim-imbentaryo metten dagiti nagduduma a pamilya a kwalipikado iti dadduma a cash aid tapnu maipanamnama nga amin ket agnumar ken maliklikan ti panag-awa ti maysa a pamilya iti nagtutuon a cash aid.
Dinakamat pay ni Mayor Magalong nga isimsimpadan ita ti sistema tapnu amin a benipisaryo iti Social Amelioration Program, Tupad ken ti Pantawid Pamilya ditoy siudad ket makaawat iti maymaysa a gatad – ti P5,500.
