BAGUIO CITY – Namnamaen ti Department of Labor and Employment (DOLE) nga adu a formal workers iti pribado a sektor ti agnumar iti P5,000 financial support nga ididiaya ita ti gobyerno kadagiti empleyado a naapektaran iti manarimaan nga Enhanced Community Quarantine.
Sigun kenni DOLE-Cordillera Regional Director Exequiel Ronie Guzman, kwalipikado ditoy a tulong pinansial dagiti empleyado nga addaan ti addaan ti employee-employer relationship.
Kinunana a dagitoy dagiti nasuspindir iti trabaho, naksayan iti bilang ti working days ken dagiti nag-flexible work arrangement a sagudayen ti procotols ti Enhanced Community Quarantine.
Dinakamatna a dagiti employers ti rumbeng nga agpila iti aplikasyon iti nasao a suporta babaen iti online ken isumitirda laeng ti establishment profile report on COVID-19 ken ti company payroll sakbay ti implementasyon ti Enhanced Community Quarantine.
Innayon ni Director Guzman nga adalenda ti aplikasyon dagiti employer para iti panaka-aprobar wenno panakaibasura daytoy ken iti kanito a maaprobaran ti aplikasyon ket ipatulodda ti P5,000 financial assistance iti bank account ti apektado nga empleyado.
Sigun kenkuana, itay agsapa ket dumanon iti 2,000 nga aplikasyon ti naawaten dagitoy bayat a pattapattaenda a nasurok 10,000 ti maapektaran a formal workers iti entero a Cordillera.
Naipaayanda metten iti P10-M nga standby fund a nakasagana a maipaluspos ken apaman a maalada ti pondo ket dagus a maisayangkat ti assessment.
