BAGUIO CITY – Imbinglay ni Baguio City Health Officer Dr. Rowena Galpo nga iti napalabas a pito nga aldaw ket nadlawda ti napartak a panagngato ti kaso ti COVID-19 iti siudad.
Sigun kenkuana, iti napalabas a dua a lawas ket kadawyan a 40-60 a kaso ti COVID ti mailislistada iti innaldaw ngem ita a lawas ket nagbalin a 90-100 a kaso iti innaldaw.
Dinakamatna nga iti napalabas a tallo nga aldaw ket nagbalin a 150 ken 120 ti nagpositibo iti innaldaw.
Maipalagip a naudi a napasaran idi napalabas a bulan ti Abril ti agdama a tawen ti panagngato ti kaso ti COVID-19 iti siudad.
Kabayatanna, iti agdama ket addan iti critical level ti panagawat dagiti ospital ken isolation facilities ti siudad kadagiti COVID-19 patients.
Sigun kenni Dr. Galpo, 88.76% ti critical care utilization rate kadagiti ospital ditoy Baguio a kaipapananna nga 88.76% nga okupadon dagiti isolation beds ken ICU kadagiti ospital a nailatang para kadagiti COVID patients.
Innayonna a 70% met ti critical care utilization rate kadagiti isolation facilities ti siudad a masarakan sadiay Teacher’s Camp, Santo Niño Hospital ken iti Laurel Dormitory.
