BAGUIO CITY – Dumanon iti nasurok 100 kgs a marijuana bricks ken tubular marijuana stalks, ken kagudua a milyon a cash ti kinumpiskar ti nagtipon a pwersa ti Kibungan PNP ken Kapangan PNP manipud iti tallo a nginginaen a kotse ken motorsiklo iti insayangkatda a checkpoint sadiay Lomon Junction, Kapangan, Benguet itay agsapa.
Segun kenni PCI Jim Helario, hepe ti Kapangan Police, adda ti informant a nangipaay iti impormasyon mainaig kadagiti maibiahe a kontrabando isut gapuna a dagusda a nangipatungpal iti nainget a checkpoint.
Pinara dagitoy ti tallo a kotse ken maysa a motorsiklo bayat a ti maysa pay a kotse ket simyasi iti kalsada ken naglibas.
Iti inspeksyon dagiti otoridad ket nakitada ti sinaksako a bricks ti napagango a bulong ti marijuana ken tubular marijuana stalks a nabalkot iti masking tape.
Nakemmeg iti nasao nga operasyon ti sangapulo ket lima a tattao pakairamanan ti uppat a menor de edad ken tallo a babai, ken nakumpiskar kadagitoy ti nasurok kagudua a milyon a cash a bayad ti gumatang kadagiti kontrabando.
Kumkumpirmaren met laeng dagiti otoridad ti impormasyon a maysa a balud iti Bacoor City Jail ti gimmatang kadagiti nasao a marijuana.
Kabayatanna, makikokoordinar itan ti pulisya iti Land Transportation Office para iti posible a panakabigbig dagiti agtagikua kadagiti kotse a nakailuganan dagiti marijuana.
Pakairamanan dagiti nginginaen a kotse ti maysa a toyota fortuner nga addaan iti plaka a UZI-267, hyundai accent nga addaan iti conduction sticker no. MQ 4127, toyota tamaraw nga addaan iti plaka a TRK-542 ken motorsiklo nga addaan iti plaka a 3721 SZ.
Maysa kadagiti nasao a lugan ket tagikua ti maysa a pulis ngem impetteng ti pulis a saanna nga ammo nga inaramat ti driverna ti lugan daytoy a pangiluganan iti marijuana.
Kabayatamma, nakikoordinar metten ti Benguet Police iti La Union Police para iti posible a panakaharang ti nakalibas a black fortuner a napumpunno met laeng iti marijuana.
Sumangsango met iti kaso a panaglabsing iti Comprehensive Dangerous Drugs Act of 2002 dagiti suspek pakairamanan ti uppat nga indibidual a manipud Les-eng, Tacadang, Kibungan; maysa manipud iti Dada, Poblacion, Bakun; innem ti manipud Bacoor City, Cavite; ken uppat ti menor de edad.
