BAGUIO CITY – Ginatang ti municipal government ti Bocaue, Bulacan ti 13,200 a kilo ti nagduduma a nateng manipud kadagiti mannalon ti Bauko, Mountain Province.
Sigun kenni City Mayor Joni Villanueva, maiwaras dagiti nasao a nateng kadagiti agarup 16,000 a senior citizens ti Bocaue kas paset ti relief operations.
Naamuan a dagiti nasao a nateng ket bukbuklen ti repolyo, karot, sayote, patatas ken broccoli.
Kinunana a saan laeng a maipaayan iti nasustansia a nateng dagiti residente sadiay ngem ketdi, natulonganda pay dagiti mannalon nangruna ta limitado ita ti panagbiahe gapu iti implementasyon ti Enhanced Community Quarantine iti entero a Luzon gapu iti COVID-19.
Dinakamat pay ti mayor a ginatangda dagiti nasao a nateng kalpasan a dimmanon kenkuana ti pakaseknan dagiti mannalon iti Cordillera partikular ti rigat dagitoy a mangilako iti mulada a nateng gapu iti manarimaan a community quarantine.
Impeksa met dagiti mannalon ti panagyamanda iti inaramid ti nasao a mayor.
