BAGUIO CITY – Naituding a madadael inton March 15, aldaw ti Lunes ti nasurok 1,400 a nakumpiskar ken saan a nasaka a weighing scales wenno pagkiluan nga adda iti kustodiya ti Baguio City Market Office ken ti City Treasury Office.
Sigun kenni City Market Superintendent Fernando Ragma Jr., madadael dagitoy babaen iti road roller.
Kinunana a ti panakakumpiskar dagiti nasao a pagkiluan ket resulta ti agtultuloy a panangwanawanda iti merkado publiko ti siudad manipud kadagiti paliado, awanan ti seal ken saan a na-calibrate a pagkiluan tapnu masalwadan dagiti konsyumer ken saanda a magundawayan dagiti sumagmamano a vendors.
Dinakamatna a nasustinir ti linawas a panagsukimat ken panangeksamenda kadagiti pagkiluan iti merkado publiko.
Innayonna a dagus a kumkumpiskarenda dagiti paliado, awanan ti seal ken saan a na-calibrate a pagkiluan bayat a mabalin a sakaen dagitoy dagiti agtagikua apaman a maipa-calibrate ti pagkiluanda ken mabayadan ti multa daytoy.
Iyap-apela pay ni Ragma ti panangaramat dagiti konsyumer kadagiti “timbangang bayan” a naimuntar kadagiti napili a disso iti Baguio City Public Market tapnu makita no awan ti parikut iti dagsen ti ginatangda a produkto.
