BAGUIO CITY – Mangisayangkat manen iti Job ken Business Fair ti Department of Labor and Employment (DOLE) – Cordillera, Department of Trade and Industry (DTI) ken Public Employment Services Office (PESO) sadiay Baguio City National High School – Main Campus kagiddan ti panakarambak ti Labor Day inton Mayo 1 manipod alas siete iti agsapa agingga alas singko ti malem.
Sigun iti DOLE – Cordillera Regional Director Ezekiel Ronnie Guzman, dumanon iti 31 a lokal a kompanya wenno establishmento ditoy lokalidad ti makipaset iti jobs fair.
Kinunana a malaksid kadagiti lokal a kompanya, makipaset met laeng ti 14 nga overseas recruitment agencies a mangidiaya iti panggedan sadiay balllasiw taw.
Innayonna a nasurok 14,000 a panggedan ti mailukat iti nasao nga aldaw para kadagiti amin nga agsapsapol iti paggedan.
Gapu iti daytoy, ibalbalakadna ti panangisagana dagiti maseknan iti adu a kopya dagiti maikalkalikagum a dokumento kas iti biodata wenno resume, birth crtificate, high school wenno college diploma, transcript of records ken clearances manipod iti NBI, pulisya ken iti barangay.
Ti tema ti Labor Day ita a tawen ket “Pagpupugay sa Manggagawang Pilipino: Dangal ng lahi, kabalikat sa progresibong pagbabago”.