BAGUIO CITY–Narekober ti nasurok 160 a pidaso dagiti naputed a kaykayo nga aggatad iti dumanon P26,000 kabayatan ti nagsisina nga anti-illegal logging operation dagiti pulis iti probinsiya ti Benguet itay laeng nabiit.
Nasarakan ti 15 a pidaso dagiti naputed a kayo kabayatan ti panagpatrolya dagiti otoridad sadiay Minac, Dalipey, Bakun.
Narekober met sadiay Kakbong, Ambassador, Tublay ti 32 a pidaso dagiti naputed a kaykayo.
Nadiskobre dagiti pulis dagiti nasao a kayo iti igid ti karayan iti panangisayangkatda iti anti-illegal logging operation kas panagrespondeda iti naawatda nga impormasyon seknan iti panakapukan dagiti nasao a kayo.
Narekober met dagiti otoridad sadiay Kabayan ti 25 a pidaso dagiti naputed a kayo, partikular sadiay Sitio Peglito iti Barangay Bashoy.
Nadiskobre pay dagiti otoridad dagiti 95 a pidaso dagiti naputed ken naragadi a kaykayo sadiay Labey, Ambukalo, Bokod.
Naiturong metten dagiti narekober a kaykayo iti istasyon ti pulisya para iti panakaipasidong dagitoy iti umno a disposisyon.
