BAGUIO CITY – Dumanon iti uppat a gasut duapulo ket siyam ti sinerbisyoan ti Baguio City Police Office City Advisory Council iti panakibinnadang ti nagduduma nga institusyon iti impatungpalda a Medical Mission and Mini-concert iti Igorot Park, siudad ti Baguio ita nga aldaw.
Segun kenni Soledad Benwaren, dadaulo ti BCPO CAC, nabilin ti amin nga station commanders nga agpili iti uppat a pulo a benepisaryo kadagiti nagduduma a barangay iti masakopan dagitoy.
Iti baet daytoy ket nagawatda latta kadagiti walk-in beneficiaries nga impaayanda iti serbisyo.
Karaman kadagiti impaayda a serbisyo ket medical, dental, legal, ken spiritual services.
Innayunna a naiwarasan met laeng iti water purification bag ti amin a barangay ti siudad tapnu adda ti mainayun iti disaster tool dagitoy.
Kinunana a nangiwarasda met laeng iti wheelchair kadagiti agkasapulan, malaksid pay iti naipatungpal a mini-concert a nanglinglingay kadagiti benepisaryo dagitoy.
