BAGUIO CITY – Nakakolektar ti lokal a gobyerno ti Baguio iti nasurok P242,000 manipud kadagiti nakemmeg a naglabsing kadagiti linteg-trapiko ditoy siudad iti uneg laeng ti tallo nga aldaw.
Sigun kenni PCI Oliver Panabang, dadaulo ti Traffic Enforcement Unit ti Baguio City PNP, insayangkatda ti tallo nga aldaw nga One Time Bigtime Operation, kabinnadang dagiti 10 nga istasyon ti Baguio City PNP.
Kinunana a ditoy a nagbaklasda iti plaka dagiti lugan a naglabsingt iti anti-obstruction ordinance ti Baguio ken dagiti iligal a nakaparada kadagiti kalsada.
Sigun kenkuana, nakabaklasda iti dumanon iti 873 a plaka iti tallo nga aldaw nga operasyon dagitoy.
Innayonna a kangrunaan kadagiti natiliwda dagiti naglabsing iti Anti-Road Obstruction Order a dumanon iti 407 ken dagiti naglabsing iti anti-illegal parking a dumanon iti 39.
Nakatiliw pay dagitoy iti lima a colorum a lugan ken pito ti nakemmeg gapu iti truck ban.
Maipalagip a dumanon iti P2,000 ti multa dagiti aglabsing iti truck ban bayat a P5,000 iti anti-colorum law malaksid pay iti impoundment fee dagitoy.
