BAGUIO CITY – Dumanonen iti 265,764 wenno 81% nga umili iti Baguio City ti nagparehistro iti National ID manipud Disyembre 31 agingga iti agdama.
Iti interview ti Bombo Radyo Baguio, kinuna ni PSA Baguio-Benguet Focal Person Jude Lo, puntirya ti ahensiya a mairehistro ti 100% eligible population ti siyudad kas maitunos iti pammilin ti Philippine Statistic Authority Central Office.
Dinakamat ni Lo a kabadanganda dagiti kameng ti Barangay Local Government Unit ( BLGU’s) a mangguyogoy ken mangipakaawat kadagiti umili iti kinapateg ti National ID.
Innaldaw a nakalukat dagiti sumagmamano a registration area kas ti Malcom Square ken Porta Vaga manipud alas otso ti agsapa agingga alas singko trenta ti malem tunggal aldaw.
Nupay kasta, posible a mairikep ti registration area sadiay Malcom Square inton Enero 31 ngem nakalukat latta met ti opisina ti PSA Baguio-Benguet.
Kabayatanna, dumanon met iti 299,009 wenno 79% nga umili iti Benguet ti nagparehistro iti National ID.
Inlawlawag met ti opisyal a nabuntog ti panakaimprinta ti National ID gapu iti parikut kadagiti printing office.
