BAGUIO CITY – Naipasidong iti repatriation ti nasurok 280 a Pilipino manipud North ken South Africa idi napalabas a bulan.
Iti ekslusibo nga interbyu ti Bombo Radyo-Baguio ken ni Philippine Ambassador to Nigeria Shirley Ho-Vicario, kinunana nga iti umuna a batch ket naipasidong iti repatriation ti 207 a Pilipino ken iti maikadua ket 77 nga OFWs.
Inlawlawagna a nagtaud dagitoy manipud iti 15 a pagilian a sakup ti Philippine Embassy sadiay Nigeria.
Dinakamat ti ambassador nga awan ti gastos ti embahada iti panagawid dagiti nasao a Pilipino gapu ta naipatungpal ti diplomatic relations ti Pilipinas kadagiti host countries.
Kinuna ni Vicario a boluntario ti panagawid dagiti Pilipino a naipasidong iti repatriation ken awan ti napilitan kadagitoy.
Sigun pay iti opisial, maipampamuspusan ita ti pannakairaman dagiti Pilipino sadiay West ken South Africa iti programa ti gobierno a pannakaipaay ti 200 dollars kadagiti apektado nga OFWs.
Kinunana nga adda ti tallo a Pilipino sadiay a nakaptan iti COVID-19 ngem naimbaganen ti dua kadagitoy ken agtultuloy nga agpapaimbag ti maysa.
Maibasar iti listaan, adda ti agarup 3,000 a Pilipino workers sadiay West ken South Africa ken kaaduan kadagitoy ket skilled workers kadagiti kompania ti gas ken konstruksion.
Innayon ni Vicario nga inton Mayo 4 ket maisardeng ti lockdown sadiay Nigeria ngem maipatungpal latta dagiti quarantine protocols.