![](https://img.bomboradyo.com/baguio/2021/06/transient-1.jpg.png)
BAGUIO CITY -Dumanon iti 374 nga accomodation establishments ditoy Baguio City ti impaayan ti Deparment of Tourism (DOT)-Cordillera iti certificate of accreditation wenno certificate of compliance a mang-akomodar kadagiti turista.
Sigun kenni Supervising City Tourism Operations Officer Engr. Aloysius Mapalo, bukbuklen daytoy dagiti babassit ken dadakkel a hotel, transient house ken home stay.
Nupay kasta, kinuna a nababa dagiti nasurok 300 a bilang no idilig iti 1,000 a pakabulan a bilang dagiti transient houses ditoy siudad nga ag-op-operate idi awan paylaeng ti presentia ti COVID-19 pandemic.
Gapu iti daytoy, imbinglayna nga agtultuloy ti panangsukimat ti DOT-CAR ken lokal a gobyerno kadagiti accomodation establishments nga agap-aplikar iti akreditasyon tapno maipasigurado nga agtulnogda kadagiti minimum public health standards kabayatan ti operasyon dagitoy.
Inaklon ni Mapalo a nagsagaba ti industriya ti turismo idi naipasidong ti National Capital Region (NCR) plus bubble iti Modified Enhanced Community Quarantine (MECQ) no sadinno awan ti napasangpet ti Baguio City a turista nangrugi iti ngudo ti Marso agingga Abril 12 ti agdama a tawen.
Dinakamatna pay a nangrugi laeng a ti panagturong ditoy siudad dagiti nasurok 500 a turista iti ngudo ti Abril, ngimmato pay daytoy iti 1,400 iti ngudo ti Mayo agingga a nailista ti 2,900 a turista manipud NCR plus nangrugi idi June 1 agingga June 13.
Mamati ti opisyal a nakatulong daytoy kadagiti accomodation establishments gaputa nagun-odda ti 50% capacity a nakalanad iti community quarantine guidelines nga impaulog ti Inter-Agency Task Force for the Management of Emerging Infectious Diseases.