BAGUIO CITY–Dumanonen iti nasurok 40 a colorum lugan ti nakumpiskar ti Land Transportation Office-Cordillera manipud idi bulan ti Hunyo agingga iti umuna nga aldaw ti Agosto.
Resulta daytoy ti agtultuloy a kampanya ti ahensia kontra iti operasyon dagiti colorum a lugan ditoy lokalidad.
Iti panakiyuman ti Bombo Radyo kenni Francis Ray Almora, Regional Director ti LTO-Cordillera, kinunana a kaaduan kadagiit natiliwda a lugan ti mangididiaya iti transportasyon, kadawyan a babaen iti social media, iti baet nga awananda iti kaskenan a dokumento.
Malaksid iti daytoy, imbutaktakna a nangato unay ti sinsingeren dagiti driver a plete dagiti pasaheros dagitoy.
Dinakamatna a gundundawayan dagiti drivers dagiti indibidiual nga agbiyahe iti uneg ken ruar ti lokalidad.
Mamingsan manen nga inlawalawag ni Almora iti publiko a maibilbilang a colorum dagiti lugan ken drivers nga awanan iti kaskenan a papeles uray kompleto ti dokumento dagiti pasaheros dagitoy.
Kinunana a dagus a ma-impound dagiti matiliwanda a colorum a lugan ken mamulta dagiti maseknan a drivers iti P200,000 malaksid pay a mapilaanda iti kaskenan a kaso.
