BAGUIO CITY – Nasurok 300 a nagkandidato iti barangay election ken nasurok 100 a nagkandidato iti SK election ditoy siudad ti Baguio ti napaay a nangpila iti Statement of Contributions and Expenditures (SOCE) dagitoy.
Iti panakiyuman ti Bombo Radyo kenni Atty. John Paul Martin, City Election Officer, karaman kadagitoy ti sumagmamano a nangabak a kandidato iti barangay ken SK.
Imbingayna nga adda ti maysa a pamilya a nangabak ti ama ken ina kas barangay officials ken ti anak kas SK official a napaay a nagsumitir iti SOCE gaputa nagbakasyon dagitoy.
Kinunana a ti rason ti dadduma iti panakapaayda a mangisumitir iti SOCE ket makumikom dagitoy iti eskwela, adu ti trabaho ken dadduma pay.
Sigun kenkuana, nabigbigdan dagiti winning candidates ditoy siudad a saan nagpila ti SOCE ken dagusda nga ipaay iti Department of the Interior and Local Government (DILG) no kiddawen ti ahensia ti listaan.
Dinakamatna a dakkel ti posibilidad a saan a makatugaw iti pwesto dagiti nangabak a barangay ken SK officials gapu iti panakapaay dagitoy a mangipila iti SOCE.
Innayonna nga addan iti DILG ti sumaruno nga aksion ta ti nasao nga ahensia ti addaan hurisdiksion kadagiti nangabak a kandidato.
Impetteng pay ni Atty. Martin nga awan ti otoridad ti COMELEC nga umawat kadagiti SOCE a maipila kalpasan ti naituding a deadline.